Maysa a lalaki a nagpammarang a vlogger ti nakemmeg idiay Barangay VII, Vigan City, Ilocos Sur ta natakuatan a daytoy ket nagtakaw iti lugan idiay Tuguegarao.
Nabigbig ti suspek a ni Charles Deric Quirolgico, agtawen iti duapulo ket walo, tubo iti Barangay Centro East, Ballesteros, Cagayan, ngem aggigyan idiay Piti Mini Street, Garden Village, Pulong Buhangin, Sta. Maria, Bulacan.
Iti pannaki-uman ti Bombo Radyo Vigan ken ni PLT. Amado Somera Jr., napan nangan ti suspek iti nasao nga establisimiento ngem idi nakanna ti ordernan ket ibagana nga awan pagbayadna isu a nakipatang iti owner a bayadanna babaen iti Gcash ti gayyemna.
Nupay kasta, ti inted a GCash number ti suspek ket ti numero ti barkada ti tinakawanna nga isu ti nangibaga iti akinkukua a ti suspek ket nagtakaw iti lugan idi alauna iti malem ti January 19.
Nangipatulod pay ti timmawag iti ladawanna iti Police Report manipud Tuguegarao City Police Station a mangilanlanad iti impormasyon.
Gapu dayta, nagreport a dagus ti establisimiento iti kapulisan para iti pannakakemmeg ti suspek.
Narekobre met ti natakaw a kotse a Toyota Vios.
Segun met ken ni Francis Flores, owner ti Hidden Garden, nakadlawda nga adda sabsabali iti suspek idi uppat nga orasnan iti establisimiento a saan a makaidna ket nakapungtot pay idi bagaan ti head waiter nga agsarradan ta kunana nga adda pay laeng katrantransaksyonna.
Nakipatang ni Flores kenkuana ket inikkanna iti 15 minutes a pawayway ket idi pagbayadaenda ket linokona pay a naipatuloden iti GCash number ti establisimiento ta idi kitaenda ket awan met ti imbayadana.
