VIGAN CITY – Dead on Arrival ti nagmaneho iti motorsiklo ta napilidan iti wing van idiay Brgy. Olo-olo Sur, Santiago.
Dagiti karaman iti aksidente ket da Felimon Bangalisan Oriel, agtawen iti uppat a pulo ket lima, naasawaan nga agnaed idiay Bry, Butubut Sur, Balaoan, La Union a nagmaneho iti Isuzu wing van idinto a ti nagmaneho ti nalabbaga a Honda Click ket ni Renan Fernando Bartolome, agtawen iti duapulo ket dua, baro nga agnaed idiay Talogtog, Candon City.
Iti pannaki-uman ti Bombo Radyo Vigan ken ni PLt. John John Garan iti Santiago Municipal Police Station, agpada nga agpapabagatan a direksyon dagiti dua a lugan idin nag-over take ni Bartolome ngem naawanan ti kontrol ti manibelana a gappuanan iti pannakaibansag ken pannakapilid iti wing van.
Segun ken ni Garan, nagsagaba iti nakaru a dunor ti biktima ta napilidan iti tiyanna isu a naipan iti Candon General Hospital ngem naideklarar a natay.
Pinasingkedan ti driver ti wing van nga uray liniklikanna ti biktima ket saanna a naigawiden a gappuanan iti pannakapilidna.
Nupay kasta, addan ti kustodiya ti driver ti wing van ta maiyur-uray ti pamilia ti biktima tapno makapagsasaritada inaig iti nasao a pasamak.
