VIGAN CITY – Dead on arrival iti ospital ti lalaki a nagmotorsiklo ta dinungpar iti nagmaneho iti aluminum van iti national highway idiay Brgy. Jardin, Tagudin.
Segun ti Tagudin Police Station, ti nagmotorsiklo iti motoposh 125 ket ni Albert Silapan Pacleb, agtawen iti uppat a pulo, naasawaan nga agnaed idiay Brgy. Pilar Sta. Cruz idinto a ti nagmaneho iti Isuzu truck aluminum van ket ni Ernie Martinez Candido, agtawen iti uppat a pulo ket tallo, naasawaan nga agnaed idiay GPL B11 L30 Malagasang, Imus, Cavite.
Sakbay iti insidente ket agpada a daldalyasaten dagiti dua a driver iti national highway iti nasao a lugar iti agduma a direksyon idi nadanonda iti nasao a lugar ket naawanan ti kontrol iti manibela ni Candido a nagmaneho iti aluminum van isu a naipan ti bangir a linya a gappuanan iti pannaidungparna iti motor a minaneho ni Pacleb.
Nadundunor ni Pacleb isu a naipan iti Ilocos Sur District Hospital, Bio Tagudin ngem naideklarar a natay babaen ti attending physician-na.
Saan pay nga ammo nu mano ti gatad ti nadadael a paset dagiti dua a lugan nga agpada a naapektaran.
Kabayatanna, addaan ti kustodiya dagiti pannakabagi ti linteg ti driver ti aluminum van a ni Candido tapno dumalan ti husto a proseso.
