Dead on arrival ti maysa a lalaki a nagmotorsiklo gapu iti pannaka-aksidentena idiay Barangay Calaoa-an, Candon City, Ilocos Sur.
Nabigbig ti drayber a natay a ni George Pacon Gadia, agtawen iti tallopulo ket lima, security guard, taga-Barangay Parioc 2nd, Candon City, minanehona ti Yamaha Sniper 155 a motorsiklo.
Agpapadaya ti motorsiklo ket idi nagtengna ti nakapasamakan ti aksidente, saan a nadlaw ti drayber ti under-construction a drainage section iti paset ti Candon City Diversion Road.
Gapu dayta, natinnag ti motorsiklo pito a kadapan ti kaunegna iti ground level ken naidungpar iti High-Density Polyethylene pipe.
Nagsagaba iti nakaro a dunor ti drayber a naitaray iti ospital ngem saanen a naispal ti biagna.
Naduktalan a nakainom ti drayber idi mapasamak ti aksidente.
