Dead on arrival ti maysa a lalaki a nagmotorsiklo gapu iti aksidente iti national highway idiay Barangay San Nicolas, San Esteban, Ilocos Sur.
Ti drayber ket agtawen iti duapulo ket walo, agnaed iti Parparia, Narvacan.
Iti pannaki-uman ti Bombo Radyo Vigan ken ni PCPT. Ivan Cliff Ananayo, awan ti makita a pakabigbigan wenno ID ti drayber idi marespondean ta cellphone laeng ti imetna isu a ti kabsatna ti nakabigbig pay laeng kenkuana.
Maibasar iti imbestigasion, agpapa-amianan ti nagmotorsiklo iti national highway ket idi madanonna ti nakapasamakan ti aksidente, kangrunaan iti kurbada a paset ti kalsada, ket nag-overshot ti motorsiklo iti northbound shoulder isu a naidungpar iti landok a poste, sementado a pader, ken kayo.
Gapu dayta, nagsagaba ti drayber iti dunor iti nadumaduma a paset ti bagina ken naitaray iti ospital ngem saanen a nakalasat.
Innayon pay ni Ananayo a mapapati a napaspas ti pataray ti drayber ken maibilang nga accident-prone area ti nakapasamakan ti aksidente.
