VIGAN CITY – Maysa ti natay idinto a maysa ti nadunor iti aksidente a nakairamanan ti tallo a motorsiklo idiay Barangay Sidaoen, Sta. Cruz.
Nabigbig ti natay a drayber ti MIO motorcycle a ni Jhonnel Marquez Cortez, agtawen iti duapulo ket tallo, SK Chairman, taga-Barangay Sidaoen, Sta. Cruz.
Ti met Kawasaki Barako155 motorcycle ket minaneho ni Ruel Hagacer, agtawen iti tallopulo ket lima, taga-Barangay San Tiburcio, Sacledo.
Kabayatanna, ti met nagmaneho iti Honda CCG125 motorcycle ket ni Some Ungria Gonzales, agtawen iti uppat a pulo ket dua, taga-Barangay Lalong, Sta. Cruz.
Dagiti nagmaneho ti MIO Ken Honda CCG125 a motorsiklo ket agpada a nakainom idi mapasamak ti insidente.
Maibasar iti imbestigasyon, agpapa-amianan ti MIO idin ta idi nadanunna ti nakapasamakan ti insidente, ket immakar manipud iti outer lane a napan iti inner lane ngem naawanan iti kontrol gapu iti saan a nasayaat a pannaka-aspalto ti kalsada, isu a naidungpar iti makasinnabetna a Kawasaki Barako155.
Kalpasan ti sumagmamano a minutos, ti agpapa-abagatan met a Honda CCG125 ket nagdinnungparda pay ti MIO.
Naitaray ti nagmaneho iti MIO iti Sta. Lucia District Hospital ngem naideklarar a dead on arrival.
Ti met nagmaneho ti Kawasaki Barako155 ket naglemma met ti akin kannigid nga abaga ken sakana idinto a saan a naan-ano ti nagmaneho iti Honda CCG125.
