VIGAN CITY – Natayen idi nasarakan ni Roderick Rapanut Ragel, agtawen iti uppat a pulo, naasawaan, taho vendor nga agnaed idiay Brgy. Ampuangan, Sta. Maria gapu iti pannakaaksidentena bayat ti panagmotorsiklona idiay Brgy. Cabaroan, Sta. Maria.
Segun ken ni PEMS Sanny Orpilla iti Sta. Maria Police Station, nakaawatda iti report inaig iti pannakakita ti bangkay iti maysa a farm to market road kangrunaan iti kanal idiay Brgy. Cabaroan, Sta. Maria isu a nagrespondeda ket nakitada ti nasao a lalaki.
Segun ken ni Orpilla, idi alas kuatro iti malem idi September 2 ket laplapdanen ti asawana ti biktima nga agmotorsiklo ta naka-inom ti arak ngem saanna a dinenggeg ket nagtuloy latta a nagmotorsiklo.
Iti imbestigasyon, idi nadanon iti nasao a lugar ti biktima a nakamotorsiklo ket mapapati a naawanan ti kontrol ti manibela gapu ti napigsa a tudo a gappuanan ti pannakatinnagna iti kanal karamanen ti motor nga inaramatna ngem na-stuck a gappuananen ti pannakatayna.
Nagsagaba iti dunor ti nadumaduma a paset iti bagina ngem naideklarar babaen ti attending physician-na a ni Dr. Roselyn Barasi nga MHO iti Sta. Maria.
