VIGAN CITY – Agtaltalinaed iti ospital para ti naan-anay a pannakatamingna ti lalaki a nagmotorsiklo a naidungpar iti pick-up idiay Brgy. Pug-os, Cabugao
Nabigbig ti nagmaneho iti motorsiklo ni Johnrey Serrano, agtawen iti sangapulo ket siam a taga-Quezon idinto a ti nagmaneho iti pick up ket ni Robin Barillos, agtawen iti uppat a pulo ket tallo, territory sales manager a taga-San Nicolas, Ilocos Norte.
Agpapa-abagatan a direksion ti motorsiklo idin ta saanna a nakontrol ti manibela ti luganna ta napaspas nga agpataray ket naipan iti bangir a linya ti kalsada isu a nadungparna ti agpapa-amianan a pick up.
Gapu ti dayta, nagsagaba iti dunor ti rupa ti nagmaneho ti motorsiklo pakairamanan ti dadduma pay a paset ti bagina idinto a ti drayber ti pick up ket saan a nadangran.
