VIGAN CITY – Dunor iti ulo iti sinagaba ti maysa a lalaki a nagmaneho iti motorsiklo ta naidungpar iti kongkreto nga alad idiay Brgy. Fuerte, Caoayan, Ilocos Sur.
Segun ti Caoayan Municipal Police Station ti nagmaneho ti Yamaha Mio Sporty ket ni James Carl Pagud Utanes, agtawen duapulo ket dua, baro nga agnaed idiay Barangay Capangpangan, Vigan City.
Agpapaabagatan a direksyon iti nasao a lugar ni Utanes bayat a nakamotorsiklo nga awan ti inaramatna a helmet idin naidungpar iti kongkreto nga alad a gappuanan ti pannakadunor iti ulona isu a naipan iti RHU Caoayan ngem naiyakar iti Ilocos Sur Provincial Hospital, Vigan City para iti pannakatamingna.
Kabayatanna, saan pay nga ammo nu mano ti gatad ti nadadael a paset ti lugan nga itan ket adda iti kustodiya tii pannakabagi ti linteg.
