VIGAN CITY – Maysa a lalaki a nagmotorsiklo iti nadundunor gapu iti pannakaidungparna iti maysa a van iti national highway idiat Brgy. Lacong, Tagudin.
Segun ti Tagudin Municipal Police Station, ti nagmaneho ti nangisit a Hyundau Starex van ket ni Jojo Badongan, agtawen ti tallopulo ket pito, baro nga agnaed idiay Brgy. Porporiket, Sudipen, La Union idinto a ti nagmaneho ti nangisit a Euro 110 a motorsiklo ket ni Romel De Fiesta, agtawen ti sangapulo ket walo, baro nga agnaed idiay Brgy. Pudoc East, Tagudin.
Agpada nga agpapaamianan a direksyon dagiti dua a lugan kas maibasar iti CCTV footage, idi bimmuntog ti taray ti van ken nagsignal nga agsikko iti akin-kannigid a paset iti kalsada tapno sumrek ngem ti saan a nabigbig a lugan iti likodna ket kellaat a nagpreno a gappuanan ti panangagaw ti nakamotor iti akin-kannigid a linya tapno maover-take-nna iti lugan nga adda iti sangwananna a gappuanan ti pannakaidungparna iti van nga agturong iti kannigid a paset iti kalsada.
Gapu dayta, nadunor iti ulo ken naduma-duma a paset ti bagi ti nakamotorsiklo idinto a saan a naan-ano ti driver ti van.
Kabayatanna, naipan iti Ilocos Sur District Hospital-Tagudin ti nagmotorsiklo para iti pannakatamingna.
