VIGAN CITY – Nadundunor ti maysa a lalaki a nagmotorsiklo ta nakadinnungparna iti kurong-kurong iti national highway idiay Barangay Sta. Monica, Magsingal, Ilocos Sur.
Segun ti Magsingal Municipal Police Station, ti nagmaneho iti kurong-kurong ket ni Efren Ullero Butas, agtawen iti uppat a pulo ket pito, naasawaan, mannalon nga agnaed idiay Barangay Sarsaracat, Magsingal idinto a ti nagmaneho iti Suzuki Raider motorcycle a color blue ket ni Mark Laurence Tadeo Macabeo, agtawen iti tallopulo, naasawaan nga agnaed idiay Barangay Codoog, Narvacan.
Nagballasiw ti kurong-kurong iti national highway manipod daya nga outer lane nga agturong iti laud a direksyon idin saanna a napansin ti sumungad a motorsiklo a gappuanan ti panagdinnungparda iti tengnga iti kalsada.
Gapu dayta, nadunor ti akin-kannawan a luppo ken dadduma a paset ti bagi ti nagmotorsiklo idinto a saan a naan-ano ti driver ti kurong-kurong.
Agpada a naipan iti Ilocos Sur District Hospital – Magsingal dagiti dua a driver para iti physical wenno medical examination.
