VIGAN CITY – Maysa iti nadundunor gapu iti aksidente a nakairamanan dagiti nagmaneho iti SUV ken motorsiklo idiay Brgy. Becques, Tagudin.
Segun ti Tagudin Municipal Police Station, ti nagmaneho iti motorsiklo ket ni Angelo Jorvina Azurin, agtawen iti sangapulo ket siam, baro, awanan trabaho nga agnaed idiay brgy. Bacsayan, Sta. Cruz idinto a ti nagmaneho iti SUV ket ni Manuel Licudine Valdez, agtawen ti innem a pulo ket dua, naasawaan, retired nurse nga agnaed idiay Brgy. Becques, Tagudin.
Maibasar iti inisyal nga imbestigasyon, pinasingkedan ni Karl Matthew Carbonel nga agpada a daldalyasaten dagiti dua iti kalsada manipod ti agduma a direksyon idin nagsinyas ken nagsikko iti akinkannigid a direksyon iti SUV idinto a ti napaspas a driver ti motorsiklo ket saan a nakapreno nga insigida gapu iti napaspas a tarayna a gappuanan iti pannakaidungparna iti akinkannawan a paset iti SUV.
Naipan iti Ilocos Sur District Hospital Brgy. Bio-Tagudin ti nagmaneho ti motor gapu iti pannakadunorna iti nadumaduma a paset iti bagina idinto a ti driver iti SUV ket saan a naan-ano.
Kabayatanna, saan pay nga ammo nu mano ti gatad iti nadadael a paset iti lugan nga addaan iti kustodiya dagiti pannakabagi iti linteg.
