Lalaki a nagmotorsiklo ken nakadungpar iti aso, naaksidente iti ili ti Sinait

VIGAN CITY – Naipaagas iti ospital ni Mark Ericson Rumbaoa Dela Cruz, agtawen iti duapulo, college student, taga-Barangay Root, Dingras, Ilocos Norte gapu ti pannaka-aksidentena iti ili ti Sinait.

Nakamotorsiklo ni Dela Cruz a mangdaldalyasat iti agpaabagatan a direksyon idin ta nadungparna ti agwarang-warang nga aso a bimmallasiw iti highway ket saanna a nakontrol ti manibela ti luganna a puon ti pannakadisgrasyana.

Gapu dayta, nagasgasan ti akin-kannawan nga ima ken saka ni Dela Cruz.

Ti met motorsiklona ket nadadael ti sangwanan a pasetna ken nagasgasan kasta payen a napitpit iti akin-kannawan a pasetna.