VIGAN CITY – Dead on arrival ti maysa a lalaki a nagmaneho iti motorsiklo gapu ti pannaka-aksidentena idiay Barangay Suso, Sta. Maria.
Nabigbig ti nagmaneho iti Honda RS 150 Sonic a nangisit a ni Christian Dasugo Aleluia, agtawen iti duapulo ket dua, painter a taga-Brgy. Tinaan, Sta Maria.
Iti pannaki-uman ti Bombo Radyo Vigan ken ni Police Captain Joel Dasargo iti Sta Maria Police Station, nagsagba iti nakaro a dunor iti ulo ken natukkol ti saka ti drayber a puon ti nakatayanna.
Agpapa-abagatan a direksyon ti biktima idin ta idi nakadanun iti paset iti Suso Bridge ket napugsat ti kadena ti luganna isu a saanna a nakontrol ti manibela ket naidungpar iti poste ti solar light nga adda iti akin-kannawan a paset ti kalsada.
Mapapati a nakainom ti biktima ken awan ti helmet-na idi napasamak ti insidente.
