VIGAN CITY – Dead on arrival ti maysa a lalaki a nagmotorsiklo ta naaksidente iti Centennial Bridge idiay Brgy. Maynganay Norte, Sta. Maria.
Iti pannaki-uman ti Bombo Radyo Vigan ken ni PLt. Joel Dasargo iti Sta. Maria Municipal Police Station, ti nagmaneho iti orange ken gold Rusi MP110 motorcycle ket ni Robert Bedar Vendiola, agtawen iti tallopulo ket dua, baro, mannalon nga agnaed idiay Brgy. Nagtupacan, Sta. Maria.
Segun ken ni Dasargo, napaspas iti panagpataray iti motorsiklo ni Vendiola ta mapapati nga adda iti mapanna gatangen ngem naka-inom iti arak isu nga idi nakadanon iti nasao a lugar ket naawanan ti kontrol iti manibelana a gappuanan iti pannakaaksidentena.
Nupay addaan ti helmet ni Vendiola ket saanna nga inaramat isu nga idi naidungpar iti asideg iti rangtay ket naibansag ti helmet-na ken naitama ti rupana iti pader.
Naipan pay laeng ni Vendiola iti Ilocos Sur District Hospital Narvacan para iti pannakatamingna ngem indeklarar ti attending physicianna a natay.
