VIGAN CITY – Dead on the spot ni Benjie Gadong, agtawen iti tallopulo ket lima a taga-San Nicolas, Candon City gapu ti pannakadungpar ken panakapilidna idiay Brgy San Nicolas, San Esteban.
Ti trailer truck a nakadungpar ken nakapilid iti biktima ket ni Renato Blanza Taberdo, agtawen iti tallopulo ket siam a taga-Brgy. Tabiog Bucay, Abra.
Iti pannaki-uman ti Bombo Radyo Vigan ken ni PLt. Arnold Calzado, hepe ti San Esteban Police Station, agawid koman ti biktima a naggapu idiay Sta. Maria a nakahelmet bayat ti panagmanehona idin ta natukbob iti nag-overtake a trailer truck iti agkurba a paset ti dalan.
Nayalud-od ti biktima iti limapulo a metro a mapatta-patta a kaadayona ket naikalso iti pilid ti trak a nakaik-ikkatan iti helmet ken badona.
Nagsagaba iti nakaro a dunor iti ulo ken nadumaduma a paset ti bagi ti biktima idinto a ti drayber ti trak ket saan a nadangran ken nakakustodia itan iti San Esteban Police Station tapno sangwenna ti kaso kontra kenkuana.
