VIGAN CITY – Maysa ti pimmusay ken maysa iti matamtaming ti ospital ta naaksidenteda idiay Brgy. Baliw, Laud Sta. Maria.
Nabigbig ti pimmusay ken nagmaneho ti Yamaha Aexro a ni Jaytro Costales agtawen ti tallo pulo ket pito, mangngalap ken nadundunor ni Jayward Vicencio agtawen ti dua pulo ket uppat agpada nga agnaed ti Brgy. Lingsat, Sta. Maria.
Iti pannaki-uman ti Bombo Radyo Vigan kenni PCapt. Joel Dasargo, mangidaulo ti Sta. Maria Municipal Police Station, agpada nga agpapaabagatan a direksyon ti motor a nagluganan dagiti biktima ken ti maysa a 10 Wheeler Truck a minaneho ni Bryan Apio agtawen ti tallo pulo agnaed ti Brgy. 6, Laoag City, Ilocos Norte.
Idi makadanun dagiti dua a lugan iti masimsimpa a rangtay nagmenor ti truck iso a naidungpar ti motorsiklo dagiti biktima iti likod a paset ti truck ken naipasirok pay.
Naipan idiay Ilocos Sur District Hospital Narvacan dagiti dua ngem dead on arrival ni Costales.
