VIGAN CITY – Natay ti lalaki a nagmaneho iti tricycle ta nadungpar ti maysa a multicab idiay Brgy. Caburao, Santiago.
Nabigbig ti biktima a ni Mario Corpuz nga agtawen ti lima pulo ket tallo nga agnaed idiay Brgy. Basiligan, Banayoyo.
Maibasar iti inisyal nga imbestigasyon dagiti kameng ti Santiago Municipal Police Station, agsikko a mapan iti kannigid a direksyon ti Euro 150 tricycle a minaneho ti biktima idi dinungpar iti kinasinnabet na nga agpa-amyanan a Suzuki Multicab a minaneho ni Melvin Dagdag nga agtawen ti uppat a pulo ket maysa ken agnaed idiay Brgy. Taliao, Burgos.
Nagsagaba iti nakaru a donor ti ulo ken bagi ni Corpuz a naideklara a dead on arrival idiay Candon City Hospital idinto a saan met naananu ni Dagdag a nakadungpar kenkuana.
