Lalaki a nagmaneho iti motorsiklo, natay gapu ti pannakaidungparna iti poste

VIGAN CITY – Dead on arrival ni Leumark Soliba Abumiawan, agtawen iti tallopulo, agnaed iti Barangay Villia Quirino, San Esteban gapu ti pannaka-aksidentena idiay Barangay Dan-ar, Santiago.

Iti pannaki-uman ti Bombo Radyo Vigan ken ni PMaj. Henry Garcia, agpapa-amianan ti motorsiklo a daytoy ket saan a deretso iti panagmanehona gapuen ta nakainom iti arak idin ta napan iti bangir a linya ket naawanan iti kontrol iti manibela ti motorsiklona isu a naidungpar iti poste ti silaw.

Gapu dayta, nagsagaba iti nakaro a dunor a naipaagas iti Candon General Hospital, Candon para ti pannakatamingna ngem saanen a nakalasat.

Adda helmet ti drayber ngem saan a nakasuot kenkuana daytoy idi napasamak ti insidente kasta payen a nakainom iti arak.