VIGAN CITY – Dunor ti dila ken natukkol ti dua a saka ni Santiago Romeo Torres, agtawen iti uppat a pulo ket pito, mangisursuro a taga-14 West Labnig, San Juan gapu ti pannakaaksidentena idiay Bulag Centro, Bantay a nakairamanan ti tallo a lugan.
Agpapalaud a direksyon ti Isuzu Dump Truck a minaneho ni Bernie Piano, agtawen iti duapulo ket tallo a taga-Ora West, Bantay a mangguyguyod iti maysa nga Isuzu Crosswind idin ta naikkat ket napan iti bangir a linya isu a nadungparna iti agpapadaya a motorsiklo.
Gapu ti kapigsa ti impact ti aksidente ket nakagat ti drayber ti motorsiklo ti dilana isu a naipaagas iti Metro Vigan Cooperative Hospital idinto ta ti drayber ti dump truck ket saan a naan-ano.
Awan pay laeng ti inisyal a napagpatangan dagiti karaman ti aksidente ket patien dagiti pannakabagi ti linteg nga awan ti maipila a kaso kontra ti drayber ti trak ta saanda met a nagayatan ti napasamak.
