VIGAN CITY – Maysa ti nadunor iti napasamak nga aksidente idiay Barangay Guimod, Bantay a nakairamanan ti motorsiklo ken Isuzu Wing Van Truck.
Nabigbig ti nagmaneho iti motorsiklo a ni Prince Jirehmiel Aglugub Ambrocio, agtawen iti duapulo ket maysa, agnaed iti Barangay Paras, Sto. Domingo.
Ti met nagmaneho ti Isuzu wing van truck ket ni Larry Saocelo Tapiceria, agtawen iti uppat a pulo ket tallo, agnaed iti Lingsat, Bantay.
Basar iti CCTV footage, agpapa-amianan ti motorsiklo idin ta idi agsikko nga agpakannigid a sumrek iti JTC parking area ket natukbobna ti sarsarunwenna a trak.
Gapu dayta, nadunor ti ulo ken natukkol ti akin-kannawan a luppo ti drayber ti motorsiklo a daytoy ket naipaagas iti ospital idinto a saan met a naan-ano ti nagmaneho iti trak.
