VIGAN CITY – Dead on arrival iti balay pagagasan ti maysa a lalaki a nagmaneho iti motorsiklo a naidungpar iti dyip idiay Brgy Camanggaan, Sta. Cruz.
Nabigbig ti biktima a ni Wilson Eleazar, agtawen iti uppat a pulo, construction worker nga agnaed idiay Brgy Padaoil idin a ti nagmaneho ti dyip ket ni Zaldy Bugarin, agtawen iti tallopulo ket siam nga agnaed idiay Brgy Kinmarin, Salcedo.
Agpapalaud a direksion ti motorsiklo a minaneho ti biktima idin ta immagaw ti linya ket naidungpar iti nakasinnabetna a dyip isu a nadunor ti nadumaduma a paset ti bagina a puon ti nakatayanna.
Nupay kasta, saan a naan-ano ti drayber ti dyip ken naipanen iti Sta. Cruz Police Station tapno dumalan iti usto a proseso ken maimbestigaran pay laeng no mano ti gatad dagiti nadadael a paset ti lugan.
