VIGAN CITY – Temporaryo pay laeng a maipasarra iti Mt. Tupira kadagiti motorcycle riders ken bikers para iti kinatalgedda kas maibasar iti bilin ni Bantay Mayor Samuel Parilla II.
Iti pannaki-uman iti Bombo Radyo Vigan ken ni PCapt. Juan Jhayr Maggay iti Bantay Municipal Police Station, ti nasao nga addang ket kalpasan iti pannakaaksidente iti nagkalubbong iti motorsiklo iti agkurba a paset iti nasao a lugar.
Segun ken ni Maggay, dead on arrival ti nagmaneho iti motorsiklo a ni Jayvee Corpuz Etrata, agtawen ti duapulo, baro nga agnaed idiay Poblacion Sur, Santiago idinto a nadunor ti kinalubbonna a ni Jenifer Villanueva, agtawen ti sangapulo ket walo, balasang nga agnaed idiay Sabangan, Santiago.
Maibasar iti imbestigasyon, napan nagpasyar dagiti dua idiay Mt Tupira ket idi agawiddan nga agsalug iti dalan ket iniddep ni Etrata iti motorsiklo a gappuanan iti pannakapukaw iti preno isu a naitapwakda iti kanal a rason iti nakatayan ni Etrata.
Patien ni Maggay nga adda iti nakatamaanda pay nga immuna a natibker a banag a gappuanan iti pannakdundunorda ken nakatayan ti driver.
Kabayatanna, inlawlawag ti hepe a kadagiti laeng motorcycle rider ken bikers iti pannakapasarra iti Mt. Tupira isu a mabalin latta a mapan dagiti hikers.
