VIGAN CITY – Sumango iti kaso a panaglabsing iti Article 151 ti Revised Penal Code ni Glecerio Abalon, agtawen iti limapulo ket lima a taga-Brgy. Namruangan, Cabugao gapu ti panaglabsingna iti protocol iti baet ti pannakaisakup ti barangayda iti extreme enhanced community quarantine gapu ti adu a kaso ti Covid19.
Iti pannaki-uman ti Bombo Radyo Vigan ken ni PMaj. Franco Catalan iti Cabugao Police Station, rimuar ti suspek a saan a nagpakpakada kadagiti naka-duty a barangay officials iti quarantine control point ket nagna pay iti taltalon tapno makalibas.
Mapan koma ti suspek mangiruar iti kuarta nga impatulod ti inana a paggatangna iti agas ti putotna ket pinasungadan dagiti nakaduty a barangay official idi agawid nga isu ti pannakatiliwdan kenkuana.
Nupay kasta, nakakustodian ti suspek kadagiti pannakabagi ti linteg tapno dumalan iti husto a proseso.
