Nasurok P1,000 a gatad ti mapapati a shabu ti nakumpiskar manipud iti maysa a lalaki a natiliwan a naglabsing iti curfew iti kabaybayan iti ili ti Sta. Catalina, Ilocos Sur.
Ti suspek ket agtawen iti tallopulo ket dua, agnaed iti Laoag City, Ilocos Norte.
Agpatpatrolya dagiti pannakabagi ti linteg idin ta nakitada ti suspek iti kabaybayan ti Barangay Tamorong numan pay dimmanonen ti curfew hour.
Kabayatan ti pannakipatang dagiti pannakabagi ti linteg iti suspek, bigla nga impurwakna iti kalsada ti maysa a plastic sacher a naglaon iti 2 a piraso ti heat-sealed transparent plastic sachet nga adda lighter-na.
Nagkedked ti suspek nga ibaga ti pakabigbiganna ken ti motorsiklo nga inaramatna nga awan plakana.
Kagiddan ti panangkitada iti lugar a nangipurwakan ti suspek kadagiti nasao a banag ket ginandatna met ti aglibas ngem nalapdan dagiti pannakabagi ti linteg.
Natakuatan pay a ti motorsiklo nga inusar ti suspek ket kukua ti maysa a babai a taga-Barangay Kalaw, Dumalneg, Ilocos Norte ken naireport iti Bangui Municipal Police Station gapu iti saanna a pannakaisubli iti owner idi February 14, 2026.
Dagiti naala a drug evidence ket ti nasurok-kumurang 0.18 grams ti mapapati a shabu nga aggatad iti P1,224 a naikabil iti 2 a piraso ti heat sealed transparent plastic sachet.
Dagiti met non-drug evidence ket pakairamanan ti maysa a piraso ti transparent self-sealing plastic sachet, lighter, ken cellphone.
