VIGAN CITY – Maysa a lalaki ti natay idinto a ti kaduana ket nakalasat gapu ti pannakakorienteda bayat ti panangipatakderda ti solar street lights idiayBrgy Dayanki, Burgos.
Nabigbig ti biktima a ni Kevin Tadea, agtawen iti sangapulo ket siam a taga-Brgy Casili, Sto Domingo idinto a ti kadwana a nakalasat ket ni Eljan Torres, agtawen iti duapulo ket maysa, naasawaan a taga Poblacion, San Vicente.
Pinasingkedan ni PLt. Dondie Pagalanan, OIC iti PNP Burgos nga ikabkabit ti biktima ken ti kaduana ti solar street lights ket idin ta nasagidda ti linya ti ISECO a rason ti saandan a pannakabalanse iti bagida ken puon ti nakakorienteanda.
Umuna nga aldaw ti biktima iti dayta a trabahona ngem impanamnama met ti manager-da a tulonganna dagiti nakoriente ken isuna ti mangbayad iti hospital bill ken dagiti mabayadan iti puneraria.
