VIGAN CITY – Dead on arrival iti ospital ni Marlon Morales Del Rosario, agtawen iti uppat a pulo ket tallo, construction worker, naasawaan nga agnaed idiay Barangay Villa Laurencia, Sta. Cruz gapu ti pannakalmesna iti Kagutungan Falls idiay Barangay Daligan, Sta. Cruz, Ilocos Sur itay alas tres iti malem (April 21, 2024).
Nakaawat ti report dagiti otoridad inaig ti napasamak a pannakalmes ti maysa a lalaki iti nasao a lugar isu a nagrespondeda ket idi nakadanonda, naipanen ti biktima iti Ilocos Sur District Hospital-Sta. Lucia babaen kadagiti MDRRMO personnel ngem naideklarar a natay babaen ti attending physician-na.
Iti pakpaka-una nga imbestigasyon, timpuak ni Del Rosario iti danum iti falls manipod balete a kayo a duapulo ket lima a kadapanan ti kangatona manipod iti danum ngem saanen nga imma-on pay.
Gapu ta saanen a makita ket impadas nga insalakan dagiti kakaduana ken naisayangkat ti CPR kenkuana.
Mapapati a naka-inom ti biktima idi napan nagdigos iti nasao a falls.
