Natay gapu iti panagbekkelna ti maysa nga agtawen iti sangapulo ket walo a lalaki iti ili ti Narvacan gapu iti depresyon.
Ti biktima ket nakita ti kayongna nga adda naiputipot a tali iti tengngedna iti uneg ti kuartona.
Iti pannaki-uman ti Bombo Radyo Vigan ken ni Police Staff Sergeant Allen Rosal, ginandat ti biktima ti agpakamatay idi Agosto 2023 ngem nalapdanda, ken na-diagnose iti depresyon isu a dumaldalan iti medikasyon.
Idi simmangpet ti pamiliana manipud iti talon, nakabitinen ti biktima iti kuartona.
Naitaray iti balay pagagasan ngem naideklarar a dead on arrival.
Maibasar iti suicide note nga imbati ti biktima, nadakamatna ti kaririknana a padagsen laeng isuna ti pamiliana isu a nagkiddaw iti pammakawan.
Pressure iti pagadalan ken peer pressure ti maysa kadagiti makitkita a parikut ti biktima no apay a nagpakamatay.
