Nabigbigen ti natay a lalaki a nadungpar iti van iti national highway idi rabii idiay Barangay Nanguneg East, Narvacan, Ilocos Sur.
Iti pannaki-uman ti Bombo Radyo Vigan ken ni PMSG Stephen Aldeosa nga Investigator-on-case manipod Narvacan Municipal Police Station, ti biktima ket ni Ronnie Sala, addan ti husto a tawen, construction worker a taga-Sto. Tomas, Cabagan, Isabela idinto a ti suspek ket ni Limuel Gadingan Duque, agtawen iti uppat a pulo ket uppat nga agnaed idiay Barangay Nanguneg East Narvacan a nagmaneho iti silver Toyota Grandia.
Segun ken ni Aldeosa, naamoan nga agpapalaud a magmagna ti biktima idin nadungpar ti sumarsaruno kenkuana a van a gappuanan ti pannakaibansagna iti walo agingga sangapulo a metro isu a nadunor ti ulo ken nadumaduma a paset ti bagina ken rason iti nakatayanna.
Kinuna ni Aldeosa a ti palawag ti driver ti van, kellaat a nagballasiw ti biktima isu nga uray impadasna a liniklikan ket nadungparna latta.
Nagbuteng ti suspek isu a nagderetso iti pagtaenganda ngem idi adda nakaitudo nga isu ti nakadungpar iti biktima ket inaminna iti pasamak ken simmurot kadagiti pannakabagi ti linteg.
Kabayatanna, ingkari ti suspek a nakasagana a tumulong kadagiti magastos para iti pannakaimasayag ti biktima.
VIDEO – PMSG STEPHEN ALDEOSA
