VIGAN CITY – Iggemen dagiti pannakabagi ti linteg ti Tagudin Municipal Police Station ni Riczan Areola, agtawen iti duapulo ket pito, butcher a taga-Baracbac, Tagudin kalpasan ti pannakatiliwna iti hot pursuit operation ta naglibas kalpasan ti panangdangranna ken ni Arsenio Palangdosan Jr., agtawen iti tallopulo ket maysa a taga-Barangay Urzadan, Suyo.
Iti pannaki-uman ti Bombo Radyo Vigan ken ni PCMS. Lorenzo Cariaga, pinasingkedan kadakuada ti nakaimatang iti pasamak a ni Saviena Rodriguez, agtawen iti sangapulo ket walo a taga-Urzadan, Suyo nga agin-inom dagiti dua iti kubo ti compound ni Mario Lardizabal idin ta induron ti biktima ti suspek.
Gapu dayta, dinanug ti suspek ti ulo ti biktima isu a timmaray ngem kinamat ti suspek ket dinangranna manen agingga a naidaleb ti biktima.
Innayon ni Cariaga nga awan met ti inaramat ti suspek a natangken a banag a panangdangranna iti biktima a nagsagaba iti traumatic brain injury.
Dagiti adda iti pasamak ti nangpasardeng iti suspek idinto a ti biktima ket naipan iti Ilocos Sur District Hospital, Barangay Bio, Tagudin para ti pannakatamingna.
