VIGAN CITY – Panaglabsing iti Republic Act 9165 wenno Comprehensive Dangerous Drugs Act of 2002 ken iti Republic Act 10591 wenno Illegal Firearms and Ammunition Act ti sangwen ti maysa a lalaki a nabuy-bust ken natiliwan nga adda paltogna idiay Brgy. Daclapan, Cabugao.
Nabigbig ti suspek a ni Reynaldo Salarzon Avila Jr., agtawen iti limapulo ket dua, mannalon nga agnaed iti nasao a lugar, High Value Individual Top 4 Priority Target ti Region 1.
Iti pannaki-uman ti Bombo Radyo Vigan ken ni PCapt. Franco Catalan, dati a drug surrenderer ken naserbian idi iti search warrant ti suspek ngem nagsubli manen iti iligal nga aramidna ket makabulan a sinipsiputanda ngem pinaglibakanna a kukuana dagiti shabu a mapapati nga ilaklakona iti nasao nga ili.
Naala manipud iti suspek ti kaha ti sigarilyo a naglaon iti uppat a piraso ti heat sealed transparent plastic sachet ti shabu a nagserbi a buy bust item nga aggatad iti PHP20,400, maysa a unit ti homemade caliber 22 paltik nga addaan iti tallo a live ammunition ken maysa a cellphone.
Malaksid ti dayta, naala pay ti sangaribo a pisos a buy bust money ken duapulo ket lima a piraso ti sangaribo a pisos a boodle money.
