VIGAN CITY – Natalgeden ti kasasaad ti lalaki a binagkong ti maysa met laeng a lalaki idiay Brgy. Sulvec, Narvacan, Ilocos Sur.
Iti panakkipapatang ti Bombo Radyo Vigan ken ni PMaj. Arcadio Viloria iti Narvacan Municipal Police Station, ti biktima ket ni Mechor Balsita, agtawen ti sangapulo ket siam, baro nga agnaed idiay Brgy. Sulvec, Narvacan idinto a ti suspek ket ni Jhun Jose Blaza, agtawen ti duapulo, baro nga agnaed idiay Brgy. San Jose, Narvacan.
Segun ken ni Viloria, agawid koman a nakalugan ti motorsiklo ti biktima kaduana ti maysa a menor de edad idin pinasardeng isuda ti suspek ket simmanog isu a bimmaba ti biktima ket limmaban ngem naanawada.
Nupay kasta, idi aglugan koman ti biktima iti luganna ket kellaat nga inasut ti suspek ti kutsilyo ket binagkongna ti namin tallo a daras ti biktima ken insigida a pimmanaw kalpasan ti insidente.
Naipan iti Ilocos Sur District Hospital, Narvacan ti biktima babaen kadagiti nagresponde a PNP personnel para iti pannakatamingna idinto a simmuko ti suspek iti Narvacan Police Station babaen ti ulitegna a ni Edwardo Blaza a maysa a retirado a PNP ken agnaed idiay Brgy. San Jose, Narvacan.
Kabayatanna, nakapagsaritan ti pamilia ti suspek ken biktima ket napagtulagan a saanen a mangipila ti kaso ti kampo ti biktima ngem masapul laeng a bayadan ti kampo ti suspek iti magastos iti ospital para ti panaglaing ti biktima.
VOICE OF PMAJ. ARCADIO VILORIA
