Lalaki a nabagkong idiay Candon City, adda pay laeng idiay ospital

VIGAN CITY – Agtaltalinaed pay laeng idiay ospital ti biktima iti pammagkong idi rabii ti November 30 a ni Lemar Gabor, agtawen ti dua pulo ket dua, construction worker nga agnaed idiay Barangay San Nicolas, Candon City idinto a ti suspek a ni Joseph Gamas, nga addan iti usto a tawen, tricycle driver nga agnaed met laeng iti nasao a lugar ket ikoten dagiti otoridad.

Segun kenni Police Corporal Maximilian Calibuso ti Candon City Police Station, napasamak iti nasao a pammagkong ti maysa a pag-gasolinaan iti nasao a lugar.
Maibasar iti report, nakapila nga agpagasolina ni Gabor a nakasakay iti motorsiklona idi simmingit ni Gamas a nakatricycle isu a nagreklamo ti biktima agingga a nagsinnungbat da a dua.

Narurod ni Gamas ket inasut na iti kutsilyo a nakasalikag iti sikigan ket binagkong na ni Gabor a nakadunuran iti akin-kannigid a paset iti bukot na.

Naitaray a naipan idiay Candon Hospital ni Gabor para iti naan-anay a pannakatamingna idinto a ti suspek ket naglibas kalapasan iti pasamak.

Nadakamat ni Calibuso nga idi napasamak iti pammagkong, ti biktima iti nakainom iti arak idinto a ti suspek ket saan a nakainom.

Kabayatanna, idi oras ti alas otso y media idi kalman ket simmuko met laeng ni Gamas kadagiti otoridad ket maisagsaganan iti kaso nga attempted homicide a maipila kontra kenkuana.