VIGAN CITY – Agingga itatta ket saan pay laeng a nakasoan iti lalaki a nangulod iti tallo a kalding idiay Bantaoay, San Vicente idi alas dyes iti rabii ti April 12 ta gandat na a takawen ngem nakita iti akin-kukua a barangay tanod isu a nakemmeg.
Dukduktalen pay laeng dagiti otoridad nu ti inbaga ti lalaki a nagan na a Gerald de Leon ket isu iti pudno a nagan na ken nu taga- ano ta idi in-follow-up da idiay Langiden, Abra nga isu iti inbaga na a lugar na, inbaga met dagiti otoridad idiay nga awan iti am-ammo da nga agpilyedo ti de Leon iti lugar da.
Manipud idi naibalud ti suspek ket awan pay iti pamilya wennu gagayyem na a napan nangbisita kenkuana isu a saan pay laeng nga ammo dagiti kameng ti San Vicente municipal police station nu anya iti pudno a kinatao na, nangruna ket saan na pay nga ammo iti agbasa ken agsurat.
Nakastrek iti pagsapulan idiay Magsingal ti suspek kas katulong iti pagtaengan ken idiay Sto. Domingo kas trabahador iti lechonan.
