Lalaki a naaksidente, kritikal pay laeng kasasaad na

VIGAN CITY – Kritikal pay laeng iti kasasaad ni James Avila nga agtawen ti dua pulo ket maysa nga agnaed idiay Anonang Menor, Caoayan a naaksidente idi parbangon idi kalman, October 13 idiay Pagpandayan, Vigan City.

Maipalagip a saan nga insigida a nabigbig ti biktima agsipud ta awan ti ID ken lisensiya na idi naaksidente.

Ngem, segun ken ni Police Chief Master Sergeant Chester Dandin ti Vigan City Police Station, inaramat da ti cellphone ti biktima tapnu maamuan iti kinatao na ngem awan iti simmungbat kadagiti tinawagan da a nakaphonebook iti cellphone na.

Agsipud ta nadlaw da a kasla agpapa-abagatan a direksyon ti biktima a mapan Caoayan, nagsalsaludsod dagiti pulis kadagiti tattao a nalabasan da nu am-ammo da ti lalaki iti video nga inpakita da ken ti motorsiklo na ket ditan a natunton da a ti biktima ket taga-Anonang Menor.

Nadaraan iti utek ti biktima ken na-fracture pay iti sumagmamano a paset iti bagi na isu a tatta nga aldaw a maoperaan.