VIGAN CITY – Maysa a menor de edad iti nakemmeg gapu iti panagtakawna idiay Brgy. Cacandongan, San Juan.
Ti nasao a menor de edad ket lalaki nga agtawen ti sangapulo ket pito a taga-Brgy. Darao, San Juan idinto a ti biktima ket ni Roniefel Peneyra Villacillo, agtawen ti uppat a pulo, bato nga agnaed idiay Cacandongan, San Juan.
Maibasar ti pakaammo manipod San Juan Municipal Police Station, imbitin ti biktima ti belt bag-na a naglaon iti P35,000 iti kuboda tapno agsibog iti tabako iti nasurok kumurang sangagasut a metro iti kaadayona manipod iti kubo.
Bayat ti panagsibogna ket adda ti nagdardaras a lalaki a pimmanaw manipod iti kubo a nakaiggem iti bag isu a nagsubli ti biktima iti kubo ket naamwanna a mapukpukawen ti bagna a naglaon iti kuarta isu nga inatapna nga innala ti nasao a lalaki.
Impakaammona iti otoridad ti pasamak ket babaen ti imbestigasyonda ket nakitada ti suspek idiay Brgy. Baclig, Cabugao isu a nakemmeg ken naala kenkuana iti mapukpukaw a bag ken kuarta.
Nupay kasta, P27,700 laengen ti nakita dagiti pulis a linaon ti bag ket immamin ti suspek iti sangwanan ti amana nga isuna iti nagtakaw.
Gapu ti dayta, naipan ti suspek karamanan ti ebidensya iti San Juan Police Station tapno dumalan ti husto a proseso sakbay a maipan iti MSWDO.
