VIGAN CITY – Simmuko kadagiti pannakabagi ti linteg ni Melchor Tatson, agtawen ti dua pulo ket walo, mannalon nga agnaed idiay Sitio Caset, Brgy. Maradodon, Cabugao gapu iti saanna a naigagara a panangpaltugna iti kaduana a ni Reynaldo Tatson, agtawen ti uppat a pulo ket siam, mannalon ken agnaed iti nasao a lugar a nagsagaba iti tama ti paltog ti nadumaduma a paset ti bagina a puon ti nakatayanna.
Nakaawat ti Cabugao municipal police station iti paka-ammo manipud ken ni Brgy. Capt. Georgie Benavidez nga adda ti lalaki a simmuko kenkuana ket inpudno na a saan na a naigagara a napaltugan ti kadua na.
Agsipud iti dayta, ni Benavidez iti nangkadua ken ni Tatson a simmuko idiay Cabugao PNP.
Napan naganup dagiti dua iti kabanbantayan iti nasao a lugar ket mapapati a nagkarayam iti karuutan ti biktima ket inpagarup ti suspek a baboy ramo isu a pinaltugan na ket nakigtot idi makita na a ti kadua na iti napaltugan na babaen iti 12 gauge shotgun.
