VIGAN CITY – Agtultuloy ti imbestigasyon nga isaysayangkat dagiti kameng ti Caoayan Municipal Police Station nga idadaulwan ni P/Capt. Henry Garcia inaig ti pammaltog idi kalman idiay Barangay Callaguip, Caoayan a nakatayan ti biktima a ni Pedro Funtanilla, agtawen ti innem a pulo, naasawaan, maysa a mangngalap ken agnaed idiay Brgy. Pandan, Caoayan.
Segun ken ni Garcia, awan ti pangta a naaw-awat ti biktima wenno aniaman a nakainanaiganna a krimen ken riri itay kallabes.
Dayta ket maibasar iti panagsalsaludsod dagiti pannakabagi ti linteg kadagiti kameng ti pamilya ti biktima.
Dagiti laeng dua a putot ti biktima iti adda kaso na gapu iti pannakairaman da iti pammagkong a napasamak idiay Fuerte, Caoayan.
Idi kalman, nakalugan iti tricycle na ti biktima ta mapan na kuma balunan dagiti putot na iti custodial facility ti Caoayan PNP idi pinaltugan dagiti nakamotorsiklo a lallaki a poon iti nakatayan na.
