VIGAN CITY – Nagbekkel idiay uneg ti custodial facility ti Narvacan municipal police station ni Nolie Escobar nga agtawen ti uppat a pulo ket uppat, security guard ken agnaed idiay Laslasong, Sta. Maria ngem naikamang idiay San Antonio, Narvacan.
Nakemmeg ti suspek gapu iti panangmalo na ti dos por dos iti ulo ti katugangan na a ni Leonida Cañero nga agtawen ti walo pulo ket innem idi kalman.
Nagprobokar ti suspek gapu iti nakaro a bartek na nga isu iti nagapaan da ken ni baket na a ni Emely.
Idi saanen a maanawa ni Emely ti asawa na, nagtaray a napan nagpaarayat kadagiti kaarruba da ket nabati ti ina na nga isu iti nagpapasan ti suspek iti pungtot na ket minalo na iti ulo ti biktima ti dos por dos a kayo.
Nagresponde dagiti kameng ti Narvacan PNP ket kinemmeg da ti suspek idinto a ti biktima ket naipaagas idiay Ilocos Sur District Hospital – Narvacan.
Idi adda idiay custodial facility ti Narvacan PNP ti suspek, inusar na iti kordon ti sapin na a pinagbekkel.
