VIGAN CITY – Nakemmeg iti buy bust operation ni Johnny Abenojar Amay, agtawen ti uppat a pulo ket pito, Provincial Priority Target iti “COPLAN STEALTH” ken PDEA Target List nga agnaed idiay Brgy. VIII, Vigan City, Ilocos Sur.
Iti pannaki-uman ti Bombo Radyo Vigan ken ni PDEA Provincial Officer Anabel Cabarles, dati a nakemmeg ti suspek gapu met laeng ti illegal drugs ket idi naamwanda nga aktibo manen iti madi nga aramidna ket insayangkatdan ti monitoring a gappuananen ti pannakakemmegna.
Babaen ti panagtitinnulong dagiti pannakabagi ti linteg ket insayangkatda iti anti-illegal drugs operation a nagresultaan ti pannakaakto da iti suspek a nagilako iti maysa a heat sealed plastic sachet a naglaon iti mapapati a shabu a nagserbi a buy bust item.
Naala kenkuana ti maysa a cellphone, maysa a red sling bag nga addaan ti maysa a candy box a naglaon ti dua a heat sealed sachet a nagalon ti shabu, sangaribo a marked money, maysa a live ammunition iti cal 38 ken identification card ti suspek.
Kabayatanna, agdagsen ti naala a shabu iti nasurok kumurang dua a gramo nga aggatad ti sangapulo ket innem a ribo a pisos.
