VIGAN CITY – Maisagsaganan ti kaso a grave threat ken attempted homicide kontra ken ni Jerry Cabildo , agtawen ti lima pulo ket dua, naasawaan ken agnaed idiay Poblacion, Sta Cruz ta ginandat na a tagbaten da Richard Villamil, agtawen tallo pulo ket walo, baro kenni Marymar Cornello , agtawen tallo pulo ket walo nga agpada nga agnaed iti nasao met laeng a lugar.
Maibasar iti imbestigasyon ti Sta. Cruz municipal police station, mapan ti taltalon dagiti biktima idi kinasarita ida ni Jerry ket nadakamat na a saan a pumanaw agingga a saan na a mapatay ida.
Idi nagsinnagid ti takyag da Richard kenni Jerry, inuksot ni Jerry iti buneng na sa na kinamat dagiti biktima.
Uray man pay kasta, saan a nagballigi ti suspek a mangtagbat kadagiti dua agsipud ta adda ti bimmallaet kadakuada a barangay kagawad a nairana nga adda iti lugar idi kinamat-kamat ti suspek dagiti biktima ket inagaw na iti buneng nga iggem na.
Agsipud iti dayta, nagtitinnulongan dagiti barangay officials nga idaulwan ni Barangay Chairman Jesus Orelio Domenden nga inpan iti police station ti suspek para iti proper disposition.
