VIGAN CITY -Kaso a panaglabsing iti Republic Act 9165 wenno Comprehensive Dangerous Drugs Act of 2002 ti sangwen ti nakemmeg a drug personality idiay Baclig, Cabugao babaen iti buy bust operation.
Nabigbig ti suspek a ni Meynard De Guzman, agtawen iti duapulo ket siam, mekaniko a taga-Calunatian, Sinait ngem temporaryo nga agnaed iti Brgy. Baclig.
Iti pannaki-uman ti Bombo Radyo Vigan ken ni Cabugao Police Station Officer-in-charge P/Maj. Franco Catalan, nabayagdan a sinipsiputan ti suspek uray pay idiay ili ti Sinait ta agtultuloy latta ti panagilakona iti iligal a droga isu nga agtultuloy ti panangsapulda kadagiti supplier-na.
Naala manipud iti suspek ti maysa a piraso ti heat sealed transparent plastic sachet ti shabu a nagserbi a buy bust item, tallo a piraso ti bassit a heat sealed sachet ti shabu nga agdagsen iti 0.22 gram a ti gatadna ket lima a ribo a pisos kasta payen ti lima gasut a pisos a buy bust money.
Addan iti kustodia ti Cabugao Police Station ti suspek pakairamanan dagiti ebidensia a naala kenkuana tapno maidalan iti husto a proseso.
