Pimmusayen ti lalaki a binagsol ti kabsatna idiay Barangay Alfonso, ili ti Gregorio del Pilar, Ilocos Sur.
Ti biktima ket agtawen iti duapulo ket siam idinto a ti suspek ket kabsatna nga agtawen iti duapulo ket innem nga agpada nga agnaed iti nadakamat nga ili.
Iti pannaki-uman ti Bombo Radyo Vigan ken ni PCAPT. Floro DR Cosning Jr., acting chief of police ti Gregorio Municipal Police Station, adda ti bassit laeng a banag a saan a nagkinnaawatan dagiti agkabsat.
Agin-inom dagiti ag-kabsat iti pagtaenganda ngem adda inyebkas ti biktima a sarita a kinagura ti suspek a rason ti panangbagsol ti suspek iti akin-kannigid nga abagana.
Pimmusay ti biktima bayat a matamtaming iti balay pagagasan gapu ta nauneg ti sugat a sinagrapna ken mapapati nga adda urat a naapektaran rason ti pannakatayna.
Naaramat ti pammagsol iti maysa a kitchen knife nga adda kaatiddog-na a sangapulo a pulgada nga adda itan ti kustodiya dagiti pannakabagi ti linteg.
Desidido ti pamilia ti biktima nga agipila ti kaso kontra ti suspek a kabsatna. Reynand Fontejon
