VIGAN CITY – Saan nga agipila iti kaso ti nabagkong a ni Erwin Vito Cruz Rafanan agtawen iti duapulo ket siam kontra iti suspek a kabsatna a ni Joey Vito Cruz Rafanan, agtawen iti tallopulo tallo idiay Barangay Darao, San Juan.
Sakbay ti pasamak, ti biktima ken ti suspek kaduada ti kabsatda a ni Jumar Vito Cruz Rafanan ket agin-inom iti pagtaengan ti kayongda a ni Romulo Verazon idin ta rimsua ti saan a nagkinnaawatan ti suspek ken ti kabsatna a ni Jumar.
Inanawa ida ti biktima ken ti kayongda ngem nakapungtot ti suspek iti biktima agingga nga isuda ti nagririn ket simrek ti suspek iti pagtaenganda a nangala iti kutsilyo nga imbagkongna iti biktima.
Nakalibas iti suspek idi nagresponde dagiti polis a nagturong idiay kabambantayan ngem idi kalman ti agsapa ket insuko isuna ti kapitan.
