VIGAN CITY – Nakemmeg ni Raffy Angel Daproza, maysa a construction worker, agnaed iti Barangay Poblacion, Sta. Maria, Ilocos Sur gapu ti panangbagkongna ken ni Alfredo Directo Dasalla, agtawen iti uppat a pulo ket uppat, agnaed iti Barangay Poblacion, iti nasao nga ili.
Nakaawat dagiti pannakabagi ti linteg iti report nga adda napasamak a pammagkong idiay Sitio Romas, Barangay Poblacion, Sta. Maria ket dagus met a tinurong dagiti pannakabagi ti linteg ngem naipanen iti ospital ti biktima iti dayta a gundaway.
Ti met suspek ket nakemmeg idiay Barangay Lingsat iti nasao met laeng nga ili.
Sakbay ti pasamak, nabartek ken agpukpukaw ti suspek idin ta napan iti ayan ti biktima ket gapu ta nariri ti suspek, binagaan daytoy ti biktima a mapanen maturog ngem nairita ti suspek ket nangala ti buneng nga imbagkongna naminsan iti akin-kannigid a patong ti biktima.
