VIGAN CITY – Natalgeden ti kasasaad ti biktima iti pammaltog idiay Barangay Cuancabal, Cabugao a ni Levi Savellano nga ita ket agtaltalinaed pay laeng iti ospital.
Iti pannaki-uman ti Bombo Radyo Vigan ken ni Police Major Juan Jhayr Maggay, matmaturogen ti biktima ngem nagriing ta napan immisbo iti ruar ti balayda ket pinaltugan ti riding in tandem.
Nagsagaba iti tama ti paltog ti saka, barukong ken ima ti biktima a naipaagas iti ospital para iti pannakatamingna.
Awan ti madi a record dagiti pannakabagi ti linteg iti biktima ta maysa daytoy a law-abiding citizen iti barangayda ken awan ti pangta iti biagna.
Narekobre met iti nakapasamakan ti pammaltog ti fired empty shell ti caliber 45 ken tallo a deformed slug ti isu met laeng a paltog.
Iti agdama, adda dagiti pamalpalatpatan dagiti pannakabagi ti linteg a mabalin a makatulong iti inda panangduktal no ania ti motibo iti pannakapaltog ti biktima.
