VIGAN CITY – Inkari dagiti naduktalan nga agilaklako ti frozen bagnet iti igid ti national highway idiay Sto. Domingo a saandanton nga uliten iti agilako ti frozen bagnet kas pinasingkedanda iti pinermaanda a dokumento ket innaganan da payen nu siasino ti supplier da.
Idi kalman, nangisayangkat iti surprise inspection kadagiti agilaklako ti bagnet idiay Sto. Domingo da Municipal Agriculturist OfficerRandy Reburon kadua na da Licensing Officer 1 Ela Rocero, kenni Meat Inspector 1 Jovito Lubera ket naka-ala da ti 8 1/2 a kilo ti frozen bagnet iti uneg ti pagtaengan ni Claudette Tagorda; 5 1/4 a kilo ti frozen bagnet iti puwesto da John Natividad, agtawen ti lima pulo (50) nga agnaed idiay Puerto Real kenni Michelle Bumatay, agtawen ti uppat a pulo ket walo (48), pakairamanan ti sangapulo a kilo ti frozen bagnet iti bagnet stand ni Cheryll Tremor a kas maibasar iti report ti Sto. Domingo municipal police station.
Nu maduktalan nga agilaklako da manen ti frozen bagnet, agmuwelta danton ti limapulo a ribo a pisos para iti umuna a panaglabsing ken dua a tawen a saan da a mabalin nga aglako ken mawaswas pay iti lisensya da nga aglako.
Aminado ni Reburon nga uray nu nainget iti maipatpatungpal a quarantine checkpoint babaen ti Provincial Quarantine Office nga idaulwan ni provincial quarantine officer Martel Quitoriano, adda latta dagiti mailibas a kontrabando agsipud ta dagiti private van ken dadduma pay a pribado a lugan iti pakailugluganan da dagiti frozen a karne.
Agsipud iti dayta, kiniddaw ni Reburon iti pannakikinnammayet dagiti umili ken dagiti sabali pay a local government units tapnu maparmek dagiti agiserserrek iti frozen a karne ditoy probinsiya.
Binalakadan na pay dagiti aggatang a kitaen da a naimbag dagiti bagnet a gatangen da ta saan a frozen tapnu saan a mairuruwam dagiti aglako nga agilako kadagiti frozen bagnet.
Nu awan ti meat inspection certificate a makita dagiti aggatang iti puwesto iti gumatangan da, saandan a gumatang pay ta sigurado a saan a na-inspect dagiti lako da ken saan a presko a karne dagiti binagnet da.
