Naka-activate ti “Lakbay Alalay Program” ti Department of Public Works and Highways (DPWH) tapno masigurado ti naannayas a biahe dagiti motorista a bumisita kadagiti probinsiada ken kadagiti ay-ayatenda iti biag a pimmusayen kagiddan ti panangpaliiw iti piesta ti natay ita a tawen.
Kas paset iti programa, nangimuntar ti DPWH iti Motorist Assistance Desk.
Iti pannaki-uman ti Bombo Radyo Vigan ken ni Engr. Melvin Dulay iti Maintenance Section, tinawen nga ar-aramidenda ti nasao nga addang tapno adda pagdamagan kadagiti direksion a papanananda nangruna dagiti agdadamo ditoy probinsia.
Dua nga station ti naimuntar – saggaysa iti ili ti Bantay ken Magsingal.
Nakasagana pay met dagiti equipment-da kas ti loader, dumptruck no bilang adda kasapulan a matarimaan kadagiti kalsada.
Kunana a saan laeng a panawen ti Undas a nakaalertoda ta uray pay iti panawen ti Paskua, Baro Tawen, ken Semana Santa.
