Impasigurado ti Philippine National Police a sumango iti kaso a criminal ken administratibo ti maysa a babai a pulis, a maikonkonektar iti mapapati a shipment ti 521 kilo ti mapapati a shabu a nasalamaan idiay Laos, no mapaneknekan a nainaig isuna iti iligal a droga.
Segun ken ni PNP Chief PGen. Jose Melencio C. Nartatez Jr., naikkaten iti serbisio ti pulis ken naidalan iti restrictive custody sipud pay idi Oktubre 13, kabayatan ti panagtultuloy ti imbestigasion.
Makitintinnulongen ti PNP iti Philippine Drug Enforcement Agency (PDEA) ken dadduma pay a maseknan nga ahensia tapno maduktalan dagiti posible a karaman iti shipment ken ammuen ti kalawa ti partisipasion ti opisial.
Nupay kasta, impaganetget ti PNP a kasapulan a suroten ti due process ken maibasar iti ebidensia ti ania man a konklusyon iti kaso.
