Insayangkat ti House Committee on Public Order and Safety ti panagdenggeg kadua ti Committee on Games and Amusement inaig kadagiti krimen a nakairamanan ti Philippine Offshore and Gaming Operators.
Impakita ti Presidential Anti-Organized Crime Organization dagiti video ken ladawan a mangipakpakita nu kasano ti karanggas dagiti krimen ken dadduma pay nga illegal nga aktibidad iti POGO.
Karaman ti panang-torture kadagiti empleado ti POGO a mapapati a nangted impormasyon kadagiti otoridad inaig iti ilegal nga operasyonda idinto dagiti dadduma ket nakemmeg iti panaglibasda.
Kinuna ni PAOCC Undersecretary Gilbert Cruz a bigbigen dagiti law enforcement agencies dagiti maitultulong ti POGO iti ekonomia iti pagilian ngem saan a mabalin nga aginbu-bulsek kadagiti krimen ken kriminal nga aktibidad a nakainaigan dagiti POGO ken ti pangta iti kappia ken kinaurnos iti kagimungan.
